കവിത
തെന്നലില്‍ കുഞ്ഞ്
(ഒരു താരാട്ട്)ഉണ്ണീ ഉറങ്ങുകിന്നുള്ളം നിറഞ്ഞു നിന്‍
തൊട്ടിലാട്ടുന്നു തൈത്തെന്നല്‍ വീണ്ടും!!
ഉണ്ണീ, ഉറങ്ങുന്നു ഉള്ളം നിറഞ്ഞു നിന്‍
പുഞ്ചിരിപ്പൈമ്പാല്‍ നുകര്‍ന്ന രാവും!!
കണ്ണിണ ചിമ്മാതിളകാതെ താരകള്‍
നില്‍പ്പിതാ മേഘപ്പടവിലേറി,
കൂമ്പി മയങ്ങുന്നോരാമ്പലിന്‍ ചേലില്‍ നിന്‍
ഓമനപ്പൂമുഖം, നോക്കി നോക്കി...
ഉണ്ണീ ഉറങ്ങുകിന്നുള്ളം നിറഞ്ഞു നിന്‍
തൊട്ടിലാട്ടുന്നു തൈത്തെന്നല്‍ വീണ്ടും!!
ഞെട്ടി വിതുമ്പാതുറങ്ങുകെന്‍ കണ്മണീ
സ്വപ്നം വിതച്ച വഴിയിലുണ്ടേ
ഞെക്കുവിളക്കുമായ് മിന്നാമിനുങ്ങുകള്‍
ആട്ടവിളക്കുപോല്‍ പൊന്നമ്പിളി!!
ഉണ്ണീ ഉറങ്ങുകിന്നുള്ളം നിറഞ്ഞു നിന്‍
തൊട്ടിലാട്ടുന്നു തൈത്തെന്നല്‍ വീണ്ടും!!
സാവിത്രി രാജീവന്‍
വര: സചീന്ദ്രന്‍ കാറഡ്ക്ക
ഈ കവിത കുട്ടികളുടെ പ്രസിദ്ധീകരണമായ 'തളിര്‍' മാസികക്ക് വേണ്ടി എഴുതിയതാണ്. കുട്ടികള്‍ക്ക് ഒരു താരാട്ട് ഇരിക്കട്ടെ.
3 comments:
ഞെട്ടി വിതുമ്പാതുറങ്ങുകെന്‍ കണ്മണീ
സ്വപ്നം വിതച്ച വഴിയിലുണ്ടേ
ഞെക്കുവിളക്കുമായ് മിന്നാമിനുങ്ങുകള്‍
ആട്ടവിളക്കുപോല്‍ പൊന്നമ്പിളി!!
പുതു ഭാഷയില്‍ പറഞ്ഞാല്‍ അടിപൊളി ഭാവന ചേച്ചി.. നല്ല ഈണം.
വായിച്ചു, ആസ്വദിച്ചു
@Mad & Ahmed വളരെ സന്തോഷം..:)നന്ദി.
Post a Comment